MANILA, Philippines — Nagkaloob ang Korean Embassy ng $200,000 o P10 milyong halaga ng suporta sa isinasagawang relief operations ng Philippine National Red Cross (PRC) sa libu-libong residente ng Albay, na napilitang lumikas dahil sa patuloy na pag-aalburoto ng bulkang Mayon.
Mismong si PRC Chairman Richard Gordon ang tumanggap ng naturang donasyon mula kina Korean Ambassador to the Philippines Han Dong-Man, Minister Counselor Kyun Jongho at Chief Economist Mabellene Reynaldo.
“This timely donation will not only augment the PRC’s capacity, but is also a great contribution in providing hope to thousands of families affected by Mayon’s volcanic activities. We commend the Korean Embassy for continuously supporting us in our pursuit to alleviate the suffering of the most vulnerable,” pahayag ni Gordon, sa isinagawang simpleng turnover ceremony para sa ayuda.
Isa ang Korean Embassy sa walang sawang nagkakaloob ng tulong sa bansa sa tuwing nagkakaroon ng kalamidad.
Noong nakaraang taon ay nagbigay din ng halagang P5 milyon ang embahada na pinadaan din sa PRC bilang humanitarian assistance naman sa mga bakwit, na apektado ng kaguluhang naganap sa Marawi City.
Ayon kay Gordon, ang nakuha nilang donasyon ay gagamitin sa mga emergency relief katulad ng hygiene kits at malinis na tubig gayundin ang pagpapagawa ng dagdag na comfort rooms para sa 59 evacuation centers.
Ang PRC ay pangunahing humanitarian organization sa bansa, na mayroong 103 chapters at dalawang milyong volunteers.