MANILA, Philippines - Higit sa pagkapanalo, obligasyon ng bawat kandidato na siguraduhing maging malinis, patas at kapani-paniwala ang eleksyon kung saan ang lahat ay mabibigyan ng pagkakataong makaboto at mabilang ng tama ang kanilang boto.
Ito ang naging panawagan ni vice-presidential bet Sen. Francis “Chiz” Escudero sa kanyang mga kapwa kandidato, tatlong araw bago ang halalan bilang paghahanda sa anumang tangka na dayain ang resulta ng eleksyon.
Hinikayat din ni Escudero ang taumbayan na maging mapagmatyag at hindi dapat matakot na ihayag o ipaalam sa kinauukulan ang anumang maling gawain sa araw ng eleksyon.
“Sana magtulungan tayong matiyak na magiging malinis at kapani-paniwala po ang halalan. Sinuman ang paboran ng halalan, trabaho nating bantayan ‘yan. Kahit na boto pa ng kalaban namin ay babantayan ng aming watcher dahil bahagi ng aming mandato na tiyaking malinis at kapani-paniwala ang darating na eleksyon,” ani Escudero sa isang panayam sa radyo.
Siniguro rin ni Escudero na nakahanda ang kanyang grupo na protektahan hindi lamang ang karapatan ng mga mamamayan na makaboto kundi maging ang kanilang boto at masigurong ang mga tunay na inihalal ng taumbayan ang syang mananalo.