MANILA, Philippines - Mismong ang finance minister ng Bangladesh na si A.M.A Muhith ang nagsabing nakakasiguro siya na ang pagnanakaw sa Bank of Bangladesh ng 81 milyong dolyar ay isang inside job o kagagawan mismo ng mga tao sa loob ng bangko partikular mismo ng mga opisyal ng central bank.
Sa pahayag ni Muhith, lumalabas na walang kinalaman ang mga nauna ng pinagbintangang Chinese hackers daw, ang SWIFT na siyang messaging system sa funds transfer ng halos lahat ng bangko sa buong mundo, at ng lokal na mga bangko sa Pilipinas tulad ng RCBC.
Idiniin ni A.M.A Muhith na nakasisiguro siyang 100% na may kinalaman ang mga opisyal ng bangko sentral ng naturang bansa dahil lubhang napakahirap ang hacking na mangyari sapagkat ayon sa kanya kailangan ang handprint o guhit ng mga kamay ng anim na tao na kailangang ilagay sa isang plato na may pagkakasunod bago makapaglipat ng pondo ang Bangladesh Central Bank.
Ito din ang pinagdiinan ng Society for Worldwide Interbank Financial Telecommunications (SWIFT) na nagdaos ng press conference sa Pilipinas na wala din sa kanilang sistema ang pagkakamali at ang utos para sa mga funds transfer ay nanggaling mismo sa balidong awtorisasyon ng Bangladesh Central Bank na inatentikuhan lamang ng SWIFT.
Ayon sa mga eksperto, paano mo naman tatanggihan ang pondo na galing mismo sa isang balidong Central Bank transfer na may susog ng pinaka-eksperto sa komunikasyon ng lahat ng bangko sa buong mundo.
Bago pumasok ang pera sa Pilipinas, ang tatlong access code ng mga opisyal ng Bank of Bangladesh ang ginamit para mabuksan ang pera na nakalagak sa Federal Reserve of New York na gumamit naman ng tatlong malaking bangko sa Amerika para ilipat ang 81 milyong dolyar sa RCBC na awtorisado din ng SWIFT.
Lumalabas na tanging ang mga magnanakaw sa loob ng Bangko Sentral ng Bangladesh, sampu ng mga kakutyaba ang nakakaalam. Kung hindi pumiyok ang ilan sa Bangladesh Central Bank, ang modus ay malamang nagtagumpay. Resulta nito ang pagbibitiw ng matataas na opisyal ng Bangko Sentral ng Bangladesh.
Nakapagtataka nga daw na dumaan ang ilang araw bago inamin ng Bangladesh Central Bank na sila ay nanakawan at ito ay makalipas din ng ilang araw na sinabi ni Muhith na ‘ 100 percent inside job’ ang lahat.
Nakakapagtaka din na hindi nag-utos o nakipagtulungan sa Anti-Money Laundering Council ang Bank of Bangladesh nang isuspindi ng RCBC ang lahat ng transaksyon dahil ang pera ay kadudaduda o doubtful at malamang na labag ito sa mga batas ng anti-money laundering sa bansa. Bagkus isang simpleng request letter lamang ang kanilang ipinadala sa RCBC pagkat maging sila ay hindi nakasisiguro sa kanilang aksyong tatahakin.
Ang Bank of Bangladesh ay di man lang tumawag sa RCBC para mailinaw na ang mga transaksyon ay kaduda-duda at malamang na labag sa anti-money laundering.