Water refill stations plano nga ibutang sa siyudad sa Sugbo

CEBU, Philippines — Gihangyo ni Konsehal Jose Lorenzo Abellanosa ang Department of General Services (DGS) ug Cebu City Health Department (CHD) nga mohimo og feasibility study ug maghatag og rekomendasyon alang sa posibilidad sa pagbutang og libre nga potable water refill stations sa nagkadaiyang pampublikong lugar sa siyudad.

Tumong ni Abellanosa sa pagbutang og libreng potable water refill stations aron makatabang sa paghatag og libreng mainom nga tubig sa mga residente ug bisita ilabi na panahon sa grabe nga kainit.

Gisaysay sab sa konsehal nga ubos sa Section 16 sa Local Government Code of 1991 o Republic Act No. 7160, adunay gahum ang mga lokal nga kagamhanan sa pagpalambo sa kaayohan sa publiko pinaagi sa pagpanalipod sa kahimsog ug kaluwasan sa mga residente.

Suma pa sa naaprubahang resolusyon, daghang mga pampublikong lugar sa Sugbo sama sa mga park, merkado, plaza ug sports facilities ang gidagsa sa mga trabahante, manindahay, turista ug mga pamilya matag adlaw diin magpabilin kini sulod sa taas nga oras.

Lakip sa mga prayoridad nga butangan og libreng potable water refill stations mao ang Plaza Independencia, Carbon Market, mga pampublikong park, mga sports complex, ug uban pang lugar nga dagsaon sa mga tawo.

Alang kang Abellanosa, dako og tabang ang makabutang og libre nga water refill stations tungod kay makapamenos usab kini sa paggamit sa single-use plastic bottles ug makasuporta sab sa mga programa ni Mayor Nestor Archival alang sa pagpanalipod sa kinaiyahan.

Sa pagsugod sa administrasyon ni Archival, giplanuhan niini nga magbutang og pampubliko nga drinking water stations.

Gi-awhag usab sa mayor ang mga empleyado sa City Hall lakip na ang mga lumulupyo sa siyudad nga mogamit og reusable tumbler aron mokunhod ang plastic nga mahatod sa landfill. — /MEL (BANAT NEWS)