Imago (88)

HABANG natataranta sina Elena at ang driver na hanapin siya sa nakatalagang limang minuto, dahan-dahang gumapang si Maya patungo sa maliit na controller ng lumang cargo crane sa ibabaw ng cargo deck. Ang silid ng operator ay puno ng alikabok, ngunit ang mga mekanikal na buton nito ay nakakonekta pa rin sa mga nakabiting winch.

Sa ibaba, maririnig ang magulong sigawan nina Elena habang inilalabas ang kani-kanilang mga baril.

Tumingin si Maya sa dambuhalang kargamento ng mga kahoy na kahon na nakabitin sa itaas ng pangunahing daanan patungo sa gangplank. Hawak ang kaniyang pipe wrench, buong-lakas niyang pinalo ang kalawanging emergency lever ng winch.

Bumitaw ang lumang kable. Isang nakatutulig na ingay ng naputol na bakal ang umalingawngaw habang ang mga toneladang kahoy na kahon ay mabilis na bumagsak diretso sa gitna ng silid.

Lumikha ito ng isang dambuhalang pagsabog ng alikabok, natuyong kahoy na tuluyang humarang sa daanan nina Elena. Kumalat ang usok sa buong cargo deck habang ang driver ay napasigaw nang matamaan ng mga tumalsik na piraso ng bakal.

Hindi na nag-aksaya ng panahon si Maya. Sa gitna nang matinding usok at kawalan ng liwanag, mabilis siyang bumaba. Ginamit niya ang kaguluhan upang maglakad nang mabilis sa gilid ng railing, lampas sa natatarantang grupo nina Elena na nakulong sa kabilang bahagi ng guho.

Dahan-dahang humakbang si Maya pa­labas sa nakabukas na pinto ng barko. Tuluyan niyang itinapak ang kanyang mga basang sapatos sa malamig at sementadong sahig ng Drydock 4 habang ang mga unang yabag ng armado at abalang mga guards ng pasilidad ay nagsisimulang umakyat sa barko. (Itutuloy)