GUSTO ko ang sinabi ni Sara Carpio-Duterte sa kanyang panunumpa bilang ika-15 Bise Presidente ng Pilipinas. Binigyan-diin ni Sara sa kanyang talumpati ang pangangailangang isapuso ng bawat Pilipino ang pag-ibig sa Diyos, bayan, at pamilya.
Mahalaga ang pagkakasunud-sunod ng prayoridad—Diyos, bayan, pamilya. Una ang Diyos, susunod ang bayan, at pagkatapos ang pamilya. May posibilidad ba ng banggaan sa pagitan ng tatlong prayoridad na ito? Wala! Ibig lamang sabihin nito, pangunahin sa lahat ang ating pag-ibig sa Diyos, ngunit ito’y kailangang dumaloy at maranasan ng bayan at ng pamilya.
Walang kuwenta ang pananampalataya sa Diyos kung hindi ito naipapakita sa mga gawa ng kahabagan at katarungan. Ganito ang depinisyon ng Biblia kung ano ang mabuti, ayon sa Mikas 6:8, “Ipinakita niya sa iyo, o tao, kung ano ang mabuti. At ano ang itinatakda ng Panginoon sa iyo, kundi ang gumawa ng katarungan, at umibig sa kaawaan, at lumakad na may kapakumbabaan na kasama ng iyong Diyos?”
Ang pag-ibig sa Diyos ay hindi nangangahulugan ng pagiging relihiyoso. Ang dalisay na relihiyon at walang dungis sa harapan ng ating Diyos at Ama, ayon sa Santiago 1:27, ay ito, “ang dalawin ang mga ulila at ang mga balo sa kanilang kahirapan, at panatilihin ang sarili na hindi nadungisan ng sanlibutan.”
Kailangang maging buhay ang ating pananampalataya hindi lamang sa loob ng pamilya, kundi sa buong sambayanang Pilipino. Sabi pa ni Santiago, patay ang pananampalatang walang kalakip na gawa. Walang katuturan ang pagsasabi natin sa isang nagugutom na, “Pagpalain ka ng Diyos” kundi natin siya aabutan ng makakain.
Sa ating mga perang papel ay nakasulat ang ganito, “Pinagpala ang bayan na ang Diyos ay ang Panginoon,” na hango sa Mga Awit 33:12. Ibig sabihin, kapag ang kautusan ng Diyos ang laging susundin ng ating mga lider at bawat mamamayang Pilipino, pagpapalain ng Diyos ang Pilipinas, at kasamang mapagpapala ang bawat pamilyang Pilipino.”
Babanggit ako ng isang pagpapala sa punto ng ekonomiya. Ganito ang sabi sa Deuteronomio 28:12-13, “Bubuksan ng Panginoon para sa iyo ang kanyang kamalig na punung-puno, ang langit, upang ibigay ang ulan sa iyong lupain sa kapanahunan, at upang pagpalain ang lahat mong ginagawa. Ikaw ay magpapahiram sa maraming bansa, at ikaw ay hindi hihiram. Gagawin ka ng Panginoon na ulo at hindi buntot; ikaw ay magiging sa ibabaw lamang, at hindi ka mapapasailalim—kung iyong papakinggan ang mga utos ng Panginoon mong Diyos na aking iniuutos sa iyo sa araw na ito, na iyong susundin at gagawin.”
Bagsak ang ating ekonomiya bunga ng pandemya. Baon tayo sa utang—mahigit sa P12 trilyon at ito’y tiyak na madaragdagan pa. Patuloy na humihina ang piso kontra sa dolyar, samantalang tumataas ang inflation rate. Ang sitwasyong ito’y damang-dama ng mga Pilipino, lalo na ng mahihirap na pamilya. Ayon sa mga economic experts, kailangang kumita nang hindi bababa sa P14,000 kada buwan ang pamilyang may limang miyembro upang matugunan ang mga pangunahing pangangailangan.
Mabigat ang mga hamong ating kinakaharap, ngunit naisatinig ni Sarah Duterte ang susi sa ating pagtatagumpay—ang pag-ibig sa Diyos, bansa, at pamilya. Nawa’y seryosohin ito ng darating na administrasyon para sa kabutihan nating lahat.