Pastor na may 5 counts ng rape, huli sa Zambales

SABI ni Zambales Police Provincial Director Col. Romano Cardino, ‘‘Evil acts cannot be shielded through forms of worship!’’ 

Sinabi ito ni Cardino matapos nilang mahuli ang isang pastor na gumahasa sa isang menor de edad na mananamba niya.

Hinuli nila si Richard Elmin y Gutierrez, pastor ng Jesus is the Christ Church congregation at residente ng Purok 1, Bgy. Palis (Loob Bunga), Botolan, Zambales.

Nagsagawa sina Cardino kamakalawa ng joint operations kasama ang mga operatiba ng Oriental Mindoro PPO-PRO 4B, 305th RMFB3 at 1st PMFC-Zambales PPO, para arestuhin si Elmin sa kasong five counts of rape in relation to RA7610 sa ilalim ng Criminal Case No. 14-9089 hanggang 14-9093 na inisyu ni Judge Harry Jaminola, Presiding Judge ng RTC Branch 41, 4th Judicial Region, Pinamalayan, Oriental Mindoro noong Enero 6, 2015 at no bail recommended.

Pinagsamantalahan ni Elmin ang isang alyas Connie, isang menor-de-edad, student ng Bongabon, Oriental Mindoro noong 2015. Nang taon ding iyon, pormal na inireklamo ng magulang ng biktima si Elmin dahil sa maraming sexual advancements.

Dahil dito nagtago si Elmin ng pitong taon sa tulong ng kanyang mga kapartido. Hanggang mahuli ito ng mga pulis sa Purok 3, Bgy. Bancal, Botolan , Zambales, matapos ituro ng madlang people doon.

Dinala si Elmin sa Dr. Florentino C. Doble Memorial Hospital para sa medical examination at pansamantalang ikinulong sa Botolan jail.