ISANG lalaki sa Croatia ang nagawang makapaglakad ng 100 metro sa ilalim ng tubig upang makapagtala ng bagong world record.
Ang 23-anyos na si Boris Milosic ang kauna-unahang tao na nakapaglakad ng 100 meters kaya naman pasok na ang pangalan niya sa Guinness Book of World Records.
Nahigitan niya ang dating world record na nasa 80 metro. Ayon kay Milosic, higit na mahirap ang paglalakad sa ilalim ng tubig kumpara sa paglangoy lalo na’t kailangang nakalapat palagi ang isa niyang paa sa sahig ng pool upang hindi ma-disqualify ang kanyang world record attempt.
Kailangan din niyang mag-ingat sa paglalakad dahil baka tuluyan siyang lumutang pataas kung padalus-dalos ang kanyang magiging mga galaw.
Sunod namang target ngayon ni Milosic ang makapaglakad sa ilalim ng tubig ng kaparehong distansiya ngunit sa loob lamang ng apat na minuto.