Higit 2.7 milyong baseball cards na koleksiyon ng isang lalaki, umani ng World Record

ISANG baseball card collector sa Idaho ang nagkaroon ng Guinness World Record dahil sa naipon niyang koleksiyon ng higit 2.7 million baseball cards.

Iginawad sa 34-anyos na si Paul Jones ang Guinness World Record para sa pinakamalaking pribadong koleksyon ng baseball cards sa mundo nang makumpirma ng organisasyon na mayroon siyang higit 2.7 milyon na baseball cards.

Ayon sa mga magulang ni Jones, nagsimula ang kanyang hilig sa pangongolekta ng baseball cards noong siya’y 10 taong gulang.

Malaki raw ang naitulong ng hobby na ito sa pagpapabuti ng kondisyon ni Jones, na may Asperger’s syndrome at learning disorder.

Sa pamamagitan kasi ng pangungulekta ng baseball cards, natuto raw si Jones na magbilang, magbasa, at kung ano ang tamang spelling ng mga salita, dahilan upang maibsan ang kanyang mga kapansanan.