DESPERADO na ang isang minahan sa China na makapasa sa isang environmental inspection kaya naman kakaiba ang naisip nitong paraan upang magmukhang “environmentally-friendly”.
Pininturahan kasi ng berde ng Changsheng Rock Material Factory sa Xintai, China ang mga nahukay nitong bato upang magmukhang puno ng halaman at puno ang paligid ng kanilang minahan.
Ginawa ito ng kompanya sa pag-aakalang ang mga litrato lang na kuha ng satellite ang magiging batayan ng inspeksiyon na isasagawa ng mga kinauukulan.
Dahil sa pagtatangka nilang isahan ang pamahalaan, ipinasara ang minahan at sinuspinde ang mga namamahala nito. Tinawag pa ng mayor ng lugar na “walang konsensiya” ang kompanya dahil sa kalokohan nito.
Wala namang kadala-dala ang kompanya dahil may mga ulat na sa kabila ng pagpapasara, may mga tao at truck pa rin na labas-masok sa minahan.