633 divers, nakapulot ng 1 toneladang basura sa pinakamalaking underwater cleanup sa mundo

SALAMAT sa 633 divers na lumahok sa sinasabing pinakamalaking underwater cleanup sa mundo sapagkat 1 toneladang basura ang kanilang napulot na malaking kabawasan sa karagatan.

Upang mapabilang sa record, kailangang manatili ng 15 minuto ang bawat diver.

Kaya naman nakaabang ang Guinness adjudicator na si Michael Empric upang bilangin ang bawat diver na palusong at paahon mula sa ilalim ng karagatan.

Ngunit ayon kay Empric, hindi naman daw ang pagtatala ng world record ang tanging hangad ng pagtitipon dahil ang pangunahing layunin ng lahat ay ang makatulong sa pagpapalinis ng karagatan.

Tagumpay naman sila pareho dahil bukod sa nahigitan nila ang dating world record ay nagawa rin nilang linisin mula sa ilalim ng karagatan ang tinatayang 3200 pounds ng basura. Sixty pounds ng nasabing bigat ay dahil sa mga sinulid na nylon na ginagamit na pamingwit.