Lumang kotse, ginawang sauna sa Estonia

AGAW-PANSIN sa idinaos na sauna festival sa Estonia ang isang dilaw na lumang kotse.

Bagama’t luma na, umaandar pa rin ito at ginawa pang sauna bath ng isang grupo ng magkakaibigan.

Walang kapansin-pansin sa kotse bukod sa mataas na tubong nakapatong sa hood nito na nagsisilbing labasan ng usok na nagmumula sa sauna bath sa loob.

Dati raw karo ng patay ang sasakyan bago ito bilhin ng magkakaibigan na namamahalang mag-arkila ng mobile na sauna bath.

Tiningnan nila kasi online ang renta sa mobile na sauna bath at napag-alaman nilang mas makakamura sila kung bibili na lang sila ng lumang kotse at gagawin itong mobile sauna bath.

Tagumpay naman ang kanilang proyekto na ginastusan lamang nila ng 200 euros (katumbas ng P11,700).

Ngayon ay madalas nang tampok ang kotse bath sa iba’t ibang mga festival sa Estonia, kung saan dinarayo ito ng mga mahihilig mag-sauna bath.