HUMINGI ng paumanhin ang mga pulis sa Indonesia matapos maging viral ang video ng interogasyon nila sa isang suspek na pinaaamin nila gamit ang isang sawa.
Mapapanood sa video ang paghalakhak ng mga pulis habang ipinupulupot nila ang sawa sa nakaposas na suspek at sumisigaw sa takot.
Sa gitna ng interogasyon ay maririnig ang pagtata-nong ng mga pulis sa lalaki kung ilang beses na siyang nakapagnakaw ng cell phone.
Dalawang beses pa lamang daw niya itong nagagawa, ayon sa suspek na namimilipit sa takot.
Bagama’t aminado ang hepe ng istasyon na si Tonny Ananda Swadaya na mali ang kanilang ginawa sa suspek, ipinagtanggol pa rin niya ang kanilang kakaibang paraan ng interogasyon.
Bukod sa pagdidisiplina sa mga pulis na sangkot sa insidente, hindi naman daw nila pisikal na sinaktan ang suspek at hindi naman daw makamandag ang sawang ipinulupot sa kanya.