Lalaki nagpush-ups ng 13,186 beses sa loob ng 8 oras

NAKUHA ni Brett Masserant, isang 29-anyos na lalaki mula US ang world record para sa pinakamadaming nagawang push-ups sa loob ng 8 oras.

Halos hindi huminto si Brett sa pagpupush-ups sa loob ng 8 oras na iyon, kaya naman nagawa niyang makapag push-ups ng 13,186 beses — o katumbas ng 1,648 kada oras o 27 kada minuto.

Bukod sa nakakalulang bilang ng kanyang nagawang push-ups ay opisyal na ring kinilala ng Guinness World Records ang nagawa ni Brett, kaya malabo na itong mahigitan ng basta-basta.

Bago ito ay nakapagtala na rin ng ibang world records si Brett Masserant na may kinalaman din sa pagpupush-ups. Nagawa na niyang maitala ang world record para sa pinakamaraming push-up na nagawa sa loob ng 1 minuto (77 beses) at ang pinakamaraming push-ups habang may karga-kargang 27.2 kilong pampabigat (59 na beses).

Talaga namang push-ups ang specialty ni Brett at wala siyang planong tumigil ng pagtatala ng ilan pang world records ukol sa nasabing ehersisyo.