KUWENTO ng aking kumare, noong bata pa siya ay mayroong malaking litrato sa salas ang kanyang Lola. Kuha sa isang photo studio kung saan kinunan nang whole body ang kanyang Lola. Naka-pose ito na parang modelo. Nakasuot siya ng baro’t saya. Patay na ang kanyang lola noong panahong 7 taong gulang siya at nagbakasyon sa bahay nito. Bukod sa kanyang Lolo, dalawang uncle niya na mga binata pa noon ang nakatira sa malaking lumang bahay.
Noong nagbabakasyon siya, wala pang electric fan sa bahay ng kanyang Lolo kaya sa sofa na nasa salas siya natulog. May metal grills ang mga bintana kaya puwedeng maiwan nang nakabukas. Mahangin sa salas kaya mas maganda roon matulog kaysa bedroom.
Nasa kalagitnaan siya ng pagkahimbing nang gisingin siya ng boses ng babae. Pagmulat niya ay gumagalaw ang kanyang lola sa loob ng litrato. Ang frame ng litrato ay tila naging TV screen at ang kanyang Lola ay gumalaw at nagsalita ïto nang pasigaw sa kanya.
“Gisingin mo ang Lolo mo! Bilisan mo!”
(Itutuloy)