Talagang ang Diyos makapangyarihan
nagagawa Niya ulang magdamagan
at ito’y naganap sa aming tahanan
nitong Agosto 2 aming naramdaman!
Buhat sa San Pedro kami ay nalipat
sa bagong tahanang malaki’t matatag;
dito ay naganap ang ulang magdamag
salamat sa Diyos sa baha ay ligtas!
Ang patak ng ulan sa aming bubungan
ay naririnig kong malakas panayan;
sa bintanang bukas may screen nga lamang
kaya ang ampiyas ay nagpapasukan!
magdamag ang ulan wala namang bagyo
kaya sa palayan kailangan ito;
tagtuyot sa bansa ay malayo dito
salamat sa ulan sasagana tayo.