MANILA, Philippines — Isang motorcycle rider ang namatay noon din matapos masagasaan ng cement mixer truck sa Quezon City, kamakalawa ng hapon.
Nakilala ang biktimang si Henry Guianan na nagtamo ng matinding pinsala sa ulo at katawan na nagresulta sa agaran nitong kamatayan. Habang arestado ang driver ng mixer truck na si Daniel Calimquim.
Sa ulat ng Quezon City Police District (QCPD) Traffic Sector 3, bago naganap ang aksidente, alas-5:28 ng hapon sa Elliptical Avenue, Barangay Capitol Site ay minamaneho ng biktima ang kanyang motorsiklo at pagsapit sa kanto ng Commonwealth Avenue ay nahagip ito ng hulihang kanang bahagi ng mixer truck.
Bumagsak sa kalsada ang biktima at minalas na magulungan pa ng truck na agad niyang ikinasawi.