MANILA, Philippines — Sinabi kahapon ni Labor Secretary Silvestre Bello III na masyadong maliit ang P537 na minimum wage para sa National Capital Region (NCR).
Gayunman, ipinunto ni Bello na ang pagsasaayos sa minimum wage ay nakasalalay sa pagtatasa ng regional wage board, kung saan isinasaalang-alang din nila ang kapasidad ng mga employer na magtaas ng suweldo.
“Personally, medyo maliit na yung P537 dito sa Metro Manila. Pero ang pinakamahalagang i-consider natin ay kaya ba ng mga employers,” ani Bello.
Noong Martes, ilang grupo ng manggagawa ang humirit para sa pagtaas ng sahod kasunod ng kamakailang pagtaas ng presyo ng petrolyo.
Sinabi ni Ecumenical Institute for Labor Education and Research (EILER) executive director Rochelle Porras na dapat taasan ang sahod sa hindi bababa sa P750.
Nang tanungin kung oras na para ibigay ang pagtaas ng minimum wage, sinabi ni Bello na kailangang pag-aralan muna ng regional wage board ang mga pangangailangan ng mga manggagawa gayundin ang kapasidad ng mga employer.