MANILA, Philippines — Inihayag kahapon ng OCTA Research Group na bumaba ng bahagya ang reproduction number ng COVID-19 o hawaan sa National Capital Region (NCR) kung saan mula sa 0.36 noong Nobyembre 26 hanggang Disyembre 2 ito ay nasa 0.35 na lamang para sa Nobyembre 29 hanggang Disyembre 5 na sakop.
Kung ikukumpara naman sa kaparehong panahon noong nakaraang taon, lubhang mas mababa ito dahil noong 2020 ay mayroong 0.92 na reproduction number ang NCR.
Matatandaan na ang reproduction number na mas mababa sa 1 ay nangangahulugan ng pagbagal ng hawaan ng virus.
Mas mababa rin umano ayon sa OCTA ang average new cases na naitatala araw-araw ngayong taon na nasa 112 lamang kumpara sa 370 noong nakaraang taon.
Bagama’t walang pagkakaiba sa testing rate sa NCR, di hamak na mas mabuti na ang ipinapakita ng mga indicators nila sa taong ito.