MANILA, Philippines — Limang residente sa lungsod ng Maynila ang tinamaan ng COVID-19 Delta variant.
Ito ang kinumpirma ni Manila Mayor Isko Moreno Domagoso matapos matanggap ang resulta mula sa Philippine Genome Center (PGC) na nagpositibo sa Delta variant ang limang residente sa lungsod matapos ang tatlong linggo.
Sa kasalukuyan ay nasa mabuti nang kalagayan ang limang tinamaan ng Delta variant na ang isa ay residente sa Sampaloc, isang residente sa Parola, isang residente sa Gagalangin sa Tondo, isang residente sa Ermita, at isa sa Taft Avenue.
Nagsagawa na rin ng contact tracing at pagsusuri sa mga kamag-anak at nakausap ng mga tinamaan ng nasabing variant kung saan ilan sa kanila ay nagnegatibo at ilan ay nagpositibo sa pangkaraniwang COVID-19 ngunit sa ngayon ay magaling na.
Sa isinagawang pagsusuri sa mga nagpositibo sa nasabing sakit na nakasalamuha ng mga pasyente ng COVID-19 na may Delta variant, hindi aniya pumasa ang mga ito sa Cycle Threshold Value o CT Value para ipasa upang mapasuri sa Genome Center.