MANILA, Philippines — Magpapatupad ang Quezon City Police District (QCPD) ng road closures at traffic rerouting scheme para sa idaraos na huling State of the Nation Address (SONA) ni Pangulong Rodrigo Duterte sa Lunes, Hulyo 26.
Sa paabiso ng QCPD, pinayuhan nito ang mga motorista na bumibiyahe sa mga lansangan sa Quezon City na humanap ng alternatibong ruta dahil sa pagsasara nila sa bahagi ng Commonwealth Avenue.
Ngayong Linggo, Hulyo 25, ang buong northbound lane ng Commonwealth Avenue mula sa QC Memorial Circle/Philcoa hanggang Litex at IBP Road, ay lilinisin mula sa mga road at sidewalk obstructions habang ang mga sasakyang ilegal ang pagkakaparada ay ito-tow naman.
Ang northbound lane ng Commonwealth Avenue ay isasarado rin muna sa mga pribadong sasakyan mula alas-6:00 ng umaga. Maaari umanong dumaan ang mga ito sa North Avenue, kanan sa Mindanao Avenue, kanan sa Visayas Avenue, kaliwa sa Congressional o Tandang Sora Avenue, labas sa Mindanao Avenue, kanan sa Quirino Highway patungong Commonwealth Extension, at daraan sa right turn ng S&R Shopping Store landmark patungong southbound lane.
Ang buong kahabaan ng IBP ay ilalagay naman sa lockdown dahil sa inaasahang pagbibigay ng daloy ng trapiko.