250K Moderna vaccine darating na sa bansa
MANILA, Philippines — Nasa 250,000 doses ng Moderna COVID-19 vaccine ang nakatakdang dumating sa bansa sa Hunyo 27.
Ito ang sinabi ni vaccine czar Carlito Galvez Jr., na kung saan kabilang sa darating na bakuna ay ang binili ng mga pribadong sektor.
Idinagdag pa ni Galvez, darating din sa Hunyo 24 ang karagdagang 1.5 milyong dose ng Sinovac vaccine at ngayong buwan din ay darating ang mahigit 150,000 dose ng Sputnik V.
Inaasahan din na bago matapos ang buwan ay matatanggap na ng bansa ang donasyong bakuna ng Estados Unidos at bubuhos din ang suplay ng bakuna sa Hulyo na aabot sa 12 milyong dose ng COVID vaccine.
Sa kabuuan, nakatanggap na ng 14,205,870 dose ng bakuna ang bansa na binili ng gobyerno at pribadong sektor kasama ang mga donasyon.
Ngayong Hulyo ay inaasahang darating sa bansa ang 11,670,000 bakuna, kabilang dito ang 4.5 million Sinovac doses, 1 million Moderna vaccine doses, 1 million Sputnik V vaccine dose, 1.17 million AstraZeneca vaccine doses na binili ng mga pribadong sektor at 4 million doses ng AstraZeneca o Pfizer-BioNTech vaccines mula naman sa COVAX facility.
- Latest