MANILA, Philippines — Kinumpirma kahapon ng Food and Drugs Administration (FDA) na hindi pa napag-aaralan kung ligtas at mabisa ang Sinopharm COVID-19 vaccine na ginamit ni Pangulong Rodrigo Duterte dahil sa hindi pa nabibigyan ito ng ‘emergency use application (EUA).
Sinabi ni FDA director general Eric Domingo na personal na napili ng Pangulo ang Sinopharm at pasok naman ang punong-ehekutibo sa inilabas nilang “compassionate special permit” para magamit ang naturang uri ng bakuna.
“’Pag sinabing compassionate special permit, hindi po ‘yun authorization na binigay ng FDA. In this case, yun pong head ng PSG hospital siya ang naga-guarantee na inaral niya ang bakuna and they take full responsibility for it. Sa amin po dito sa FDA, di pa po namin na-evaluate ang bakunang iyan,” paliwanag ni Domingo.
Base naman sa ebalwasyon ng World Health Organization (WHO), ligtas umano ang Sinopharm vaccine na may similaridad sa bakuna ng Sinovac.
Sinabi naman ni Health Secretary Francisco Duque III na ang pagbakuna ng Sinopharm sa Pangulo ay base sa payo ng kanyang doktor at personal rin niyang pinili ito.