Ilegal na nagbebenta ng Ivermectin, tutugisin
MANILA, Philippines — Tutugisin at aarestuhin ng PNP-Criminal Investigation and Detection Group (PNP-CIDG) ang mga indibiduwal na sangkot sa “unregulated” o hindi awtorisadong pagbebenta at distribusyon ng Ivermectin drugs na panggamot sa COVID-19.
Ayon kay PNP-CIDG Director P/Major Gen. Ignatius Ferro, tutulong sila sa Food and Drugs Administration (FDA) na mahuli ang mga ilegal na nagbebenta at namemeke ng Ivermectin at maging ang mga hindi rehistrado, walang lisensya at permit na uri ng mga gamot lalo na sa COVID-19 sa bansa.
“The CIDG will assist the FDA in suppressing or deterring lawless elements in their criminal acts of endangering the well-being of the community,” pahayag ni Ferro.
Sinabi ni Ferro na ang PNP-CIDG bilang premyadong investigating arm ng PNP ay nangunguna sa pagsawata sa lahat ng uri ng illegal at kriminal na aktibidades bilang bahagi ng pinalakas na anti-criminality campaign.
Ang Ivermectin ay isinusulong ng ilang mambabatas na gamitin sa COVID-19 dahil abot kaya ang halaga nito at napatunayan ng mabisa na ginagamit na sa ibang bansa.
Sa kabila nito, unang nagbabala ang FDA laban sa pagbili at paggamit ng Ivermectin lalo na ang mga ospital at doktor na walang aprubadong Compassionate Special Permit (CSP) mula sa FDA. Hiniling din nito sa mga Local Government Units (LGUs) at Law Enforcement Agencies (LEAs) na tiyakin na sasawatain ang pagbebenta ng nasabing gamot sa kanilang mga hurisdiksyon.
- Latest