MANILA, Philippines — Dapat ilipat na lang sa mga isolation centers ng mga ospital ang mga COVID-19 patients nila na asymptomatic at mild cases lamang.
Ito ang naging panawagan ni Department of Health (DOH) Undersecretary Maria Rosario Vergeire sa pamunuan ng mga pagamutan dahil may naka-admit na 131 pasyenteng asymptomatic at 127 mild cases lang na dapat ay nakalaan sa mga pasyenteng “severe at critical” lamang.
Iginiit niya na dapat sundin ng mga pagamutan ang Department Memorandum 2020-0439 na nagsasaad na kailangan ng mga DOH at specialty hospitals na makipag-ugnayan sa Bureau of Quarantine (BOQ) para mailagay sa mga hotel quarantine facilities ang mga pasyenteng kumpirmado ngunit asymptomatic at mild cases.
Kaugnay rin ito ng pag-abot na ngayon sa kritikal na lebel ng kapasidad ng mga pagamutan sa National Capital Region (NCR).
Patuloy na nag-iikot na rin sa mga pagamutan si Treatment czar Undersecretary Leopoldo Vega para mabatid ang pangangailangan ng mga pagamutan at matiyak kung naipatupad na nila ang pagdaragdag ng 30% na kapasidad ng kanilang mga COVID-19 beds sa mga pribadong ospital at 30% sa mga pampubliko.