Crackdown sa quarantine violators
Ipinag-utos ng DILG…
MANILA, Philippines — Magpapatupad ng crackdown sa lahat ng quarantine violators at paiigtingin pa ang pagpapatupad ng minimum health standards sa lahat ng barangay.
Ito ang naging kautusan ng Department of the Interior and Local Government (DILG) sa lahat ng local government units (LGUs) at maging ang Philippine National Police (PNP), kasunod nang patuloy na pagtaas ng mga kaso ng coronavirus disease 2019 (COVID-19) na naitatala sa bansa nitong mga nakalipas na araw.
Ayon kay DILG Officer-in-Charge at Undersecretary Bernardo C. Florece, Jr., naglabas na siya ng direktiba kay Joint Task Force Shield Commander PLtGen Cesar Hawthorne Binag na dagdagan ang police deployment at istriktong ipatupad ang minimum public health standards sa Pasay, Malabon, Navotas, Cebu City at Cebu Province, na pawang nakapagtala nang pagdami ng mga kaso ng sakit.
“Naging kampante ang ating mga LGUs maging ang PNP sa enforcement ng ating mga minimum health standards kaya’t inaatasan ko ang ating mga local officials kasama ang mga barangay at kapulisan na puspusang ipatupad ang basic health protocols sa lahat ng barangay sa ating bansa,” ani Florece.
Binigyang-diin ni Florece na ang pagsusuot ng face masks at face shields at physical distancing ay dapat na istriktong ipatupad sa lahat ng LGUs at ang mga lalabag dito ay dapat na pagmultahin base sa mga umiiral na mga ordinansa.
Dapat ding ituloy at higpitan ang pagsasagawa ng temperature checks at paglagda ng mga contact tracing forms maging manu-mano man ito o sa pamamagitan ng Stay Safe app, sa lahat ng mga establisimyento at mga work places.
Ipinag-utos rin ang deployment ng contact tracers sa mga lugar na may pagtaas ng mga COVID-19 cases, upang matulungan ang mga local contact tracing teams sa pagtukoy sa mga naging close contacts ng mga pasyente at masuri sila.
Mahigpit din ang habilin ni Florece sa PNP na istriktong ipatupad ang curfews na ipinaiiral ng mga LGUs sa ilang lugar, na ini-adjust na ng ilan na mula alas-10:00 ng gabi hanggang alas-5:00 ng madaling araw.
- Latest