MANILA, Philippines — Pitong senador ang sumuporta sa isang resolusyon na naglalayong magkaroon na ng limited face-to-face classes sa low-risk areas o mga lugar na mababa o halos walang kaso ng COVID-19.
Sa ilalim ng Senate Resolution No. 668, inirerekomenda na ang naturang pilot testing ay magsimula sa mahigit isang libong (1,065) pampublikong paaralang mapipili ng Department of Education (DepEd) sa risk assessment nito.
Ang pitong senador na may akda ng resolusyon ay sina Senators Sherwin Gatchalian, Maria Lourdes Binay, Francis Pangilinan, Grace Poe, Pia Cayetano, Joel Villanueva, at Sonny Angara.
Ayon din sa naturang resolusyon, ang mga isasagawang pilot test ay dapat maging mahigpit sa pagpapatupad ng mga health protocols at iba pang hakbang upang mapigilan ang pagkalat ng COVID-19.
Iginiit pa sa resolusyon, ang mga pilot test ay makakalikom ng mga ebidensya at karanasan upang magabayan ang ligtas na pagbubukas ng mga paaralan.
Kasunod ng mga pag-aaral sa ibang bansang ipinapakitang hindi nagmumula sa paaralan ang pagdami ng mga kaso ng COVID-19.
Sa isang pag-aaral ng halos 191 bansa, walang kaugnayang nakita sa pagitan ng kalagayan ng mga paaralan at bilang ng kaso sa komunidad.