MANILA, Philippines — Ipinagbawal ng lokal na pamahalaan ng Arayat sa Pampanga ang pagpasok ng mga residente ng Quezon City sa banta ng bagong coronavirus variant.
Ayon kay Arayat Mayor Emmanuel Alejandrino, ito ay upang maiwasan ang pagkalat ng virus.
Papayagan namang makapasok ang mga biyahero sa bayan ng Arayat ngunit hindi dapat lumabas ang mga ito sa sasakyan.
Habang ang mga residente naman ng Arayat na nagtatrabaho sa Quezon City ay kinakailangang magsumite ng negatibong resulta ng COVID-19 test.
Matatandaang kinumpirma ng Department of Health (DOH) at Philippine Genome Center (PGC) na isang residente ng Quezon City ang nagpositibo sa bagong COVID-19 variant.
Ito ay lumipad patungong UAE noong Disyembre 27 at bumalik sa bansa nitong Enero 7 sakay ng Emirates Flight No. EK 332.
Mariin namang kinondena ng QC-LGU ang desisyon ng Arayat local government na maging istrikto sa pagpapasok ng mga residente ng Quezon City sa kanilang bayan.
Ayon sa QC LGU, walang basehan ang lokal na pamahalaan ng Arayat na hadlangan ang pagpasok ng mga taga-QC sa bayan ng Arayat na lilikha lang umano ito ng panic at deskriminasyon.