Bilyong infra budget ilaan sa COVID-19 vaccine cold storage facility
MANILA, Philippines — “Ilaan na lamang sa pagpapatayo ng mga cold storage facilities para sa bibilhing COVID-19 vaccines ang bilyong infrastructure funds na isiningit sa 2021 national budget.
Ito ang naging panawagan ni Medical Action Group Chairperson Dr. Nemuel Fajutagana na dapat bawasan ang pondo sa infrastructure ngayong 2021 dahil mas nangangailangan na pondohan muna ang COVID response ng pamahalaan.
Bukod sa bilyong halagang bibilhing bakuna ay bilyon din ang gagastusin para sa handling ng bakuna na nangangailangan ng minus 70 degree na storage facility.
Ayon kay Department of Health- (DoH) Disease Prevention and Control Bureau supervising health program officer Luzviminda Garcia, gagastos ng P3B para sa -70 degrees Celsius storage requirement sa COVID vaccine na gagamitin ng may 25M Filipino.
Inamin ni Garcia na ang pasilidad lamang na mayroon ang Pilipinas ay 8 degree hanggang-20 degree Celsius na malayo sa requirement na kailangan para sa COVID vaccine.
Ayon naman kay Vaccinologist Melvin Sanicas na dapat manatiling frozen ang COVID vaccine para maging epektibo ito at kung hindi ito maitatago nang mabuti ay mawawala ang bisa nito.
Sa paghimay ng Senado sa P667 billion budget ng DPWH sa taong 2021 lumilitaw na P447B dito ay para sa mga congressional district, nasa P620M hanggang P15 billion ang infrastructure projects ng bawat kongresista, nadiskubre rin na mayroong mga double funding, overlapping projects sa mga distrito at biglaang insertions sa budget nang maupo bilang House Speaker si Marinduque Rep. Lord Allan Velasco.”
Ilan sa tinukoy ni Lacson na may malaking infrastructure budget ay isang distrito sa Davao na may P15.351B budget; sa Albay ay P7.5B, sa Benguet ay P7.9B habang sa Abra ay P3.75B.
Hindi tinukoy ni Lacson ang mga partikular na distrito, subalit isa sa may hawak ng Distrito sa Davao ay si Davao Rep. Paolo Duterte, sa 2nd District ng Albay ay si Joey Salceda, sa Abra ay si Lone District Rep. Joseph Bernos habang caretaker naman sa Benguet si ACT-CIS Partylist Rep at House Appropriations Chairman Rep. Eric Yap.
- Latest