12 kongresista sangkot sa korapsyon sa DPWH projects — PACC
MANILA, Philippines — Nagbanta ang Presidential Anti Crime Commission (PACC) na itutuloy nila ang imbestigasyon sa maanomalyang transactions sa paggamit ng pondo kasama na dito ang pakikipagsabwatan sa Department of Public Works and Highways (DPWH) ng mga kongresista na kukuha ng kickbacks sa mga infrastructure projects na ang resulta ay isusumite kay Pangulong Rodrigo Duterte.
Ito ay kasunod ng expose ni Sen Panfilo Lacson na nasa P650-M hanggang P15-B ang infrastructure funds na matatanggap ng bawat isang kongresista sa 2021 national budget.
Sinabi ni PACC Commissioner Greco Belgica na 12 Kongresista ang idinadawit sa maanomalyang mga infrastructure projects ng DPWH sa kanilang mga distrito na pawang mga big ticket projects na pinaglaanan ng bilyong government funds.
Nabatid na nauna nang isinumite ni Belgica kay Pangulong Duterte ang mga corrupt congressman at ito pa rin ang gagawin nila at makikipagtulungan sa Office of the Ombudsman kung kinakailangan para sa pagsasampa ng kaso laban sa mga corrupt na solons.
Kinumpirma ng PACC na nakakatanggap ng 10% hanggang 15% komisyon ang mga kongresista sa mga infra projects na ginagawa ng DPWH bukod pa sa porsiyento din ng mga tiwaling DPWH officials, mga contractor at district engineers ay halos 50% na lang ang napupunta sa project cost na siyang dahilan kung bakit maraming substandard na mga proyekto.
Muling sinabi ni Lacson na hindi pa tapos ang kanyang pagharang sa naglalakihang infrastructure budget ng mga congressman, bagama’t tinapos na ng Senado ang period of debates para sa P4.5 trillion 2021 budget ay hindi nangangahulugang nakalusot na ang mga insertions na ginawa ng liderato ng Kamara nang maupo si House Speaker Lord Allan Velasco.
- Latest