MANILA, Philippines — Posibleng lumipat sa Pilipinas ang mga kumpanya na nagsilayasan sa Hong Kong dahil sa isang panukalang batas na nakahain sa Kamara na may mga kaakit-akit na benepisyo.
Sa Financial Technology Industry Development Act (HB 7760) ni Albay Rep. Joey Sarte Salceda, chairman ng House Ways and Means Committee, iniaatas ang paglikha ng ‘Financial Technology Office’ (FTO) sa Bangko Sentral ng Pilipinas (BSP) na babalangkas ng isang ‘Financial Technology Industry Roadmap’ at pagpapasulong sa ‘financial technology industry’ ng bansa.
Layunin din ng HB 7760 na pahabain ang panahon upang magkaroon ng ‘Special Investors Resident Visa’ (SIRV) ang mga mamumuhunan sa pananalaping teknolohiya at mga mangangasiwa nito, gaano man kalaki ang pupuhunanin nila, basta irerekomenda ng gobernador ng BSP.
Ang mga kumpanyang ‘fintech’ ay gumagamit ng makabagong teknolohiya sa pananalapi upang maging higit na mahusay kaysa mga tradisyunal na pamamaraan sa serbisyong pananalapi.
Kasama sa mga halimbawa nito ang ‘virtual banks, online lending facilities, crypto-currencies and blockchain.’ Si Salceda rin ang may-akda ng ‘Virtual Banking Act’ (HB 5913) na naglalayong isulong ang mga ‘virtual banks’ na masiglang tinanggap ng BSP.
Naglalayasan sa Hong Kong ang mga kumpanyang ‘fintech’ dahil sa pinatinding paghihigpit sa kanila.