MANILA, Philippines — Kasunod ng patuloy na pagtaas ng kaso ng coronavirus disease (COVID-19) sa Navotas City ay isasailalim ni Mayor Toby Tiango sa dalawang linggong lockdown ang lungsod simula sa Hulyo 16.
Naunang iniulat ng alkalde na puno na ang isolation facilities ng lungsod makaraang 31 residente ang nagpositibo sa sakit nitong Linggo na dadalhin sa quarantine facilities sa World Trade Center at Philippine Arena.
Sumailalim sa isolation ang ilang tanod, law enforcement authorities at ilan sa mga ito ang nakakuha ng sakit.
“Kaya nga po hinihingi namin ang inyong tulong at pakikiisa dahil hindi po namin kayo mababantayan lahat,” saad nito.
“Kaya sa pagpasok sa trabaho, siguruhin na parating nakasuot ng mask. Maghugas parati ng kamay. Iwasan munang sumabay sa pagkain o makipagkwentuhan nang malapitan. Sundin ang 1-2 metrong distansya para maiwasang mahawaan ng virus,” dagdag pa niya.