‘Angkas sa motor’ tinabla ng Pangulo

MANILA, Philippines — Mismong si Pangulong Rodrigo Duterte ang tumabla sa panawagan na payagan na ang pag-angkas sa motorsiklo ng magkamag-anak lalo na ng mag-asawa.

Ang tugon ng Pangulo ay inihayag sa kanyang pakikipagpulong sa Inter-Agency Task Force kahapon at tinukoy nito ang hirit ni Cebu Governor Gwen Garcia na payagan na ang angkas sa motorsiklo sa lugar nito na nasa general community quarantine (GCQ).

Giit ng Pangulo, bagaman at gusto niyang pagbigyan ang request ni Garcia at ng mga board members ng Cebu City, maaari naman siyang makasuhan ng graft and corruption kung sila ay kanyang papaboran.

“So i-demanda talaga ako. I am a prosecutor, I said, before I became mayor. I think may tama ako diyan. That’s one, I go to prison. Second is discriminatory, if at all because ang discretion ko is used to excuse one from the --- the burden of the law that is placed on another,” anang Pangulo.

Ayon naman kay Interior Sec. Eduardo Año, bagama’t nauunawaan niya ang hirap na nararanasan ng publiko, hindi naman akma sa kaligtasan ng publiko ang backriding.