MANILA, Philippines — Bukas na ngayong araw, Miyerkules ang mga tanggapan ng Land Transportation Office (LTO) sa Metro Manila para sa mga motorista na kukuha ng lisensiya, magre-renew ng lisensiya at magrerehistro ng sasakyan makaraang ipatupad ng pamahalaan ang general community quarantine (GCQ) sa National Capital Region.
Ayon sa LTO , ipaiiral ng ahensiya ang “No mask, no entry” sa alinmang tanggapan ng LTO at daraan muna sa temperature scanner ang mga papasok habang may banta pa rin ng COVID-19 sa bansa.
Sinasabing nasa 300 transactions lamang kada araw ang ipoproseso ng LTO bilang pagsunod sa protocols tulad ng social distancing at pagsusuot ng face mask.
Ipinagbabawal ng LTO na may kasama ang aplikante, bawal ding magtungo sa LTO ang mga kukuha ng lisensiya at magrerehistro ng sasakyan na may edad 20 pababa at mga senior citizens.
Hinikayat ng LTO ang mga motorista na mag-online transactions na lamang sa LTO sa www.lto.net.ph para ma-priority sila sa proseso ng kanilang papeles.
Niliwanag na ang lahat ng inabutan ng ECQ ay walang penalty license renewals at car registration at mayroon pa silang 60 day extension na makapagtransaksyon sa LTO mula sa lifting ng MECQ. Ang ending ng sasakyan na 3 o March registration, ending 4-April registration, ending 5-May registration ay walang penalty hanggang sa July para magrehistro at ang ending 6-June registration ay may hanggang August pa para makapagparehistro nang walang penalty.