MANILA, Philippines — Personal na tinanggap kahapon ni Department of Foreign Affairs Secretary Teodoro Locsin Jr. bilang kinatawan ng bansa ang nasa 100,000 COVID-19 test kits mula kay Chinese Ambassador Huang Xi Lian.
Bukod sa test kits, nagbigay rin ang China ng nasa 10,000 piraso ng N95 masks, 100,000 surgical masks, at 10,000 personal protective equipment (PPE).
Dumalo rin sa turn-over na isinagawa sa Parañaque City ang mga kinatawan ng Department of Health (DOH).
Ayon kay Dr. Joel Buenaventura, chief health program officer ng DOH’s Migrant Health Unit ng DOH, ang mga test kits ay ipamamahagi sa Research Institute for Tropical Medicine (RITM) at iba pang sub-national laboratories.
Sinabi ni Buenaventura na bagama’t hindi katulad ang brand ng mga dumating na test kits sa unang ibinigay ng China noong Lunes, halos magkapareho rin ito at malalaman din kaagad ang resulta pagkatapos ng ilang oras.
Katulad ng inaasahan, pinuri ni Locsin ang ginawang pagtulong ng China para malabanan ang COVID-19. Isa aniya itong halimbawa na dapat tularan ng buong mundo na sa halip na magsisisihan ay dapat magtulungan.