MANILA, Philippines — Hindi na umabot pang buhay sa pagamutan ang isang 74-anyos na lola matapos salpukin ng isang humaharurot na motorsiklo habang tumatawid sa kahabaan ng highway ng Purok-3, Brgy. Gaid sa bayan ng Dimasalang, Masbate kamakalawa ng umaga.
Dead-on-arrival sa Masbate Provincial Hospital ang biktimang si Nerluila Banda Lignes, residente ng nasabing barangay.
Ayon sa ulat, dakong alas-7:30 ng umaga patawid sana sa kalsada si Lignes pero sinalpok ito ng paparating at walang plakang motorsiklo na minamaneho ni Rolando Rosales Arroyo, 24-anyos, residente ng Purok-1.
Sa lakas ng pagkakabangga, tumilapon pa ng ilang metro ang matanda.
Arestado at nakatakdang sampahan ng kasong reckless imprudence resulting in homicide ang suspek.