MANILA, Philippines — Nasa mga kongresista na ang desisyon kung itutuloy pa nila ang term-sharing agreement sa pagitan nina House Speaker Alan Peter Cayetano at Marinduque Rep. Lord Allan Velasco.
“Nasa inyo na ‘yan (It’s up to you) if the parties would honor. I’m not forcing anybody to take a stand. It’s your choice because the agreement and the choice is yours. Cause you can make or unmake the Speaker,” wika ni Pangulong Rodrigo Duterte sa kanyang mensahe kamakalawa ng gabi sa joint birthday celebration nina Rep. Velasco at maybahay nitong si Wen.
Magugunita na si Pangulong Duterte ang namagitan sa term-sharing deal sa pagitan nina Rep. Cayetano at Rep. Velasco.
Sa ilalim ng term-sharing agreement ay unang magsisilbi si Cayetano bilang speaker sa loob ng 15 buwan habang si Velasco naman ang susunod sa natitirang 21 buwan.
Ilang kaalyado ni Cayetano ang nagpalutang na hindi na dapat ituloy ang term-sharing agreement at ipaubaya na lamang ni Velasco ang speakership kay Cayetano.
Siniguro naman ni Cayetano kay Velasco na tuloy ang kanilang term-sharing at walang dapat ipag-alala si Velasco sa kanilang kasunduan.