MANILA, Philippines — Pinaniniwalaang dumaranas ng matinding depresyon kung kaya’t nagpasiya ang isang opisyal ng Philippine National Police (PNP) na tapusin na lamang ang kanyang buhay matapos magbaril sa ulo sa Purok Osmeña, Brgy. Poblacion, Bagumbayan, Sultan Kudarat, Biyernes ng hapon.
Hindi na umabot pang buhay sa pagamutan si Police Major Kristian Ace Palmes Sularte, 35, binata, at nakatalaga sa PNP-11 Regional Mobile Force Battalion (RMFB).
Ayon sa ulat ng Sultan Kudarat Police Provincial Office, nagbaril umano si Sularte sa kanyang sarili sa loob ng kanyang kotse na nakaparada sa harap ng bahay ng kanyang magulang sa nasabing lugar.
Agad dinala si Sularte ng kanyang pamilya sa isang pagamutan sa Isulan Sultan Kudarat ngunit idineklarang dead-on-arrival dahil sa tama ng bala sa kanyang ulo.
Narekober namang ng mga otoridad sa loob ng kotse ng biktima ang kanyang baril na ginamit nito para kitilin ang kanyang sariling buhay.
Marami ang naniniwala na posibleng may malaking problemang dinadala ang opisyal at nakakaranas ito ng depresyon kaya nagawa nito ang pagpapatiwakal.
Patuloy ang imbestigasyon ng mga otoridad sa naturang kaso.