Dating barangay chairman itinumba

MANILA, Philippines — Isang dating barangay chairman na sumuko na noon sa Oplan Tokhang ang nasawi nang ito ay pagbabarilin ng mga suspek na lulan ng isang van sa kahabaan ng provincial road sa Purok-3, Brgy.Banao, Guinobatan, Albay kamakalawa ng hapon.

Nasawi noon din dahil sa mga tama ng bala sa katawan ang biktimang si Rolando Villa Mijares, drug surrenderee, residente ng Brgy. Bubulusan.

Sa ulat, dakong alas-4:00 ng hapon, lulan ng kanyang motorsiklo ang biktima mula sa Brgy.Banao patungo sana sa Brgy. Inascan nang sundan ng isang Toyota Hi-Ace Van.

Pagdating sa may bahagi ng inaayos na kalsada ay ginitgit ang motorsiklo ng biktima ng van dahilan para matumba ito sa ginagawang kalsada at bago pa nakatayo ay agad siyang pinagbabaril ng mga suspek.

Matapos na masigurong patay na ang biktima ay tumakas ang gunmen patungo sa direksyon ng Brgy. Inascan.