Rapist nang-agaw ng baril, bulagta
Habang kinukunan ng mugshot…
MANILA, Philippines — Bulagta ang isang rape suspect matapos umanong mang-agaw ng baril at makipagbarilan sa loob mismo ng presinto habang sugatan naman ang isang babaeng pulis na inagawan ng baril naganap sa bayan ng Parang, Maguindanao, kamakalawa ng umaga.
Naisugod pa sa pagamutan ang suspek na si Datu Mohamad Akmad, 46-anyos na taga-Brgy. Manion ng nasabing bayan, pero binawian din ito ng buhay habang nilalapatan ng lunas.
Sa ulat ng Parang-PNP, dakong alas-7:00 ng umaga habang kinukunan ng mugshot at finger print ang suspek bilang bahagi ng booking process nang bigla nitong hablutin ang baril ng isang babaeng pulis na pansamantalang ‘di muna tinukoy.
Dahil dito ay nagkaroon ng komosyon sa loob ng nasabing himpilan kung saan ipinutok ng suspek ang armas sa babaeng pulis at iba pa nitong mga kasamahan na agad namang ginantihan ng iba pang pulis na nagresulta sa pagkamatay ng suspek.
Nabatid na bukod umano sa kinakaharap na rape case ay may nauna ng mga nabiktima ng panggagahasa ang suspek kabilang na ang misis ng kanyang stepson.
- Latest