P5.7 milyong party drugs nasamsam sa BGC
MANILA, Philippines — Tumataginting na P5.7-milyong halaga ng cocaine, ecstacy at vape liquid ang nasamsam ng mga tauhan ng Philippine Drug Enforcement Agency (PDEA) na nakaimbak sa safety deposit box ng isang hotel sa Bonifacio Global City sa Taguig City, Sabado ng madaling araw.
Sa ulat ng PDEA-National Capital Regional Police Office, nasa 2,700 piraso ng tabletas ng ecstacy, 200 gramo ng cocaine at 14 na vials ng vape liquid ang kanilang nakumpiska sa isang hotel sa 5th Ave. sa naturang lugar.
Ang safety box ay nasa loob ng kuwarto na inupahan at iniwan ng drug suspek na si Domingo Uy na umano’y pinakamalaking supplier ng droga sa mga bar sa BGC.
Nahuli si Uy ng mga awtoridad noong Mayo matapos makuha ang P8.5-milyon na halaga ng droga sa kaniyang inuupahang isa pang kuwarto sa naturang hotel.
Nakikipag-ugnayan na ang PDEA sa mga hotel at iba pang katulad na establisimyento sa lugar laban sa iligal na droga na maaaring nagagamit ng mga sindikato na nagpapakalat ng party drugs.
- Latest