Trike drivers sa Malabon bibigyan ng SSS at Philhealth

MANILA, Philippines — Upang mabigyan ng proteksyon ang kinabukasan ng mga tricycle drivers na bumibiyahe sa Malabon City ay isinusulong ni Malabon City Rep. Jaye Lacson-Noel ang pagkakaroon ng mga ito ng sarili nilang Social Security System (SSS) at PhilHealth accounts.

“Dapat bigyang pansin natin ang ating mga PODA at TODA lalo na ang kanilang pamilya.” ayon kay Lacson-Noel.

Sinabi pa ng kongresista na nararapat na masiguro ang kanilang kalagayan na nalalagay sa panganib sa pamamasada kaya isinusulong niya ang pagkakaroon ng PhilHealth coverage ng mga tricycle driver.

Dapat din umano na magkaroon ng SSS membership ang mga tsuper para makakuha sila ng mga benepisyo na natatanggap ng ibang empleyado tulad ng medical, disability, loan at burial.

Ilan pa sa nais ibigay ni Lacson sa mga tricycle drivers ang educational assistance sa kanilang mga anak para magkaroon ng mas magandang buhay, tulong pangkabuhayan mula sa lokal na pamahalaan at tulong sa maintenance ng kanilang mga ipinapasadang mga tricycle at pedicab.