AFP inimbestigahan ang arms smuggling
MANILA, Philippines — Dahil sa pagkahuli sa isang mag-asawa na supplier ng mga armas ng Maute terrorist group at iba pang armadong grupo na banta sa pambansang seguridad ay pinaiimbestigahan na ng liderato ng Armed Forces of the Philippines (AFP) kung may mga aktibong sundalo at opisyal ang posibleng sangkot sa pagpupuslit ng armas na may markings ng militar.
Sinabi ni Col. Noel Detoyato, Chief ng AFP Public Affairs Office, bahagi ng masusing imbestigasyon ay ang pag-iimbentaryo sa “supply room at stocks” na nasa bawat himpilan ng militar.
Aminado ang opisyal na posibleng may mga naghuhudas na sundalo ang maaring nasa likod ng pagpupuslit ng mga armas sa arsenal ng AFP at napupunta ito sa mga gunrunners at illegal arms suppliers.
Tiniyak naman ni Detoyato na sakaling mapatunayan na may mga sundalong sangkot sa “arms smuggling” ay isasalang ang mga ito sa masusing imbestigasyon na kapag napatunayang guilty ay patatalsikin sa serbisyo.
Ang pahayag ay kasunod nang pagkakasakote ng PNP operatives sa mag-asawang supplier na sina Edgardo at Rosemarie Medel noong Linggo ng gabi sa NLEX, Valenzuela City at nasamsam sa mga ito ang ilang kahon ng armas at bala na may markings ng AFP na nagkakahalaga ng P 1.2 M na umano ay naipuslit umano mula sa kampo ng militar sa Nueva Ecija.
- Latest