Mag-utol na totoy, patay sa sunog

MANILA, Philippines — Isang magkapatid na paslit ang nasawi matapos na makulong sa loob ng kanilang nasusunog na bahay makaraang maglaro umano ang mga ito ng apoy naganap sa Brgy. Camayahan sa lungsod ng Butuan.

Kinilala ng pulisya ang mga nasawing magkapatid na sina Gabriel Tante, 4-anyos at Janjan Tante, 2 taong gulang.

Ayon sa ulat, dakong alas-11:30 ng tanghali nang maganap ang sunog habang kapwa wala sa bahay ang mga magulang nito.

Nagawa pang maisugod ng mga rumespondeng rescue team ang dalawang bata sa pagamutan bago malagutan ng hininga habang ginagamot ay naikuwento pa ni Gabriel na siya ang nagsindi ng apoy sa kanilang mga gamit sa pantulog na kanilang pinaglaruan ng kanyang kapatid.

Napag-alamang naiwan ang magkapatid sa kanilang tahanan nang mag-igib ng tubig ang kanilang ama, habang nasa palengke naman ang ina upang mamili ng kanilang gamit kaya walang nakasaklolo sa mga bata.