2 bata nilamon ng lupa

MANILA, Philippines — Nasawi ang dalawang bata habang nasugatan naman ang kanilang ina matapos na magkaroon ng landslide at matabunan ang kanilang bahay kahapon ng madaling araw sa Antique.

Ang mga nasawi ay kinilalang sina Rosalia Agapito,6 at Andrew Agapito, 3, habang nagtamo naman ng sugat ang kanilang ina na si Tessie Agapito.

Sa imbestigasyon ng pulisya na dakong alas-3:00 ng madaling araw nang maganap ang insidente habang natutulog ang mag-iina sa kanilang bahay sa Barangay Bananuan, Barbaza, Antique.

Ang walang tigil na buhos ng ulan na nagpalambot sa lupa sa bundok ang dahilan nang pagguho ng lupa na tumabon sa bahay ng mag-iina.

Nagtulong-tulong pa umano ang mga kapitbahay ng mag-iina na hilahin sila na natabunan ng mga putik at saka itinakbo sa ospital na kung saan hindi umabot nang buhay ang dalawang bata.-