MANILA, Philippines — Nagmistulang impyerno ang Mega Q-Mart na matatagpuan sa Edsa, Quezon City matapos na ito ay tupukin ng apoy sa naganap na sunog kahapon ng madaling araw.
Batay sa ulat ng Quezon City Bureau of Fire Protection (BFP), dakong alas-4:44 ng madaling araw nang magsimula ang sunog na agad umakyat sa ikaapat na alarma.
Nasa 20 tindahan o stall ang naabo sa sunog at 25% ng palengke ay tinupok sa bahagi ng dry good section.
Ayon sa BFP, naideklara nilang under control na ang sunog ng alas-5:20 ng umaga at tinatayang aabot sa isang milyon ang halaga ng napinsala ng sunog.
Patuloy ang imbestigasyon upang mabatid ang naging dahilan ng sunog na kung saan ay walang naiulat na namatay o nasaktan.