Bong Go naglunsad ng sapatos palit tsinelas

MANILA, Philippines — Isang programa na naglalayong magbigay ng sapatos sa mga deserving na mahihirap partikular na ang mga taga-bukid, mga estudyante, at mga nangangarap na maging basketball player.

Ito ang paghikayat ni Special Assistant to the President Christopher Bong Go na tumulong sa “Sapatos ni SAP, Tsinelas Ka-Swap” program.

Ang programa ay binuo ng mga pribadong indibidwal at ilan sa mga malalaking kumpanya sa bansa na nagsama-sama para sa iisang hangarin na magbigay kasiyahan sa mga nangangailangang Pilipino sa pamamagitan ng pamimigay ng sapatos.

Nakuha ang inspirasyon sa nasabing programa mula sa sinimulang adbokasiya ni SAP Go na pamimigay ng kanyang personal na sapatos kapalit ng mga sira-sirang tsinelas ng ilang mga biktima ng sunog.

Nauna na ring namigay ng sapatos ang presidential top aide sa mga nakatsinelas o nakayapak lang na basketball players sa mga lugar na kaniyang pinuntahan.

Nakatanggap ng libreng sapatos mula sa “Sapatos ni SAP,Tsinelas Ka-swap” ang mahigit 100 kabataan kabilang ang isang Aeta na si Valdolph Lundang sa opisyal na paglulunsad ng programa nitong Sabado sa Ynares Center, Antipolo City.

Binigyang-diin ni SAP Go na simpleng bagay lang ang pagbibigay ng sapatos pero malaking tulong ito para ma-inspire ang bawat Pilipino lalo na ang mga kabataan. 

Maliban sa pamimigay ng sapatos, pinangunahan din ni SAP Go ang 3-Pointer ng Bayan na iniikot nationwide upang mahikayat ang mga kabataan na mas pagtuunan na lamang ng pansin ang basketball kaysa malulong ang mga ito sa paggamit ng ilegal na droga.