Sister Fox sumasama at nagsasalita sa rali

MANILA, Philippines – Hindi totoo ang pahayag ng Catholic Bi­shop Conference of the Philippines (CBCP) na hindi raw nagsasalita sa mga rally ang Australian missionary na si Sister Patricia Fox kaya hindi dapat ito ipa-deport.

Ayon kay Presidential Spokesman Harry Roque sa media briefing, na nagsisinungaling sa CBCP si Sister Fox dahil kamakailan lamang ay nagsalita sa isang strike ng mga empleyado ng Coca-Cola sa Davao City.

Ipinakita ni Sec. Roque sa media brie­fing ang isang larawan na nagpapakitang may hawak na microphone si Sister Fox habang nagsasalita sa strike ng mga empleyado ng Coca-Cola sa Davao City kamakailan lamang.

“Palagi naman po nagsasalita yang mga yan, mga pari mga madre. Nagsasalita sa mga rally yang si Sister Fox,” dagdag pa ni Roque.

Magugunita na kamakailan ay inaresto ng mga tauhan ng Bureau of Immigration si Sister Fox sa tahanan nito sa Quezon City dahil sa pagiging undesirable alien kaugnay sa pagdalo sa mga kilos-protesta sa bansa na mahigpit na ipinagbabawal sa mga dayuhan. Pinalaya rin si Fox dahil hindi naman ito nahuli sa akto na nakikiisa sa kilos-protesta sa bansa.