MANILA, Philippines — Inihayag kahapon ng Department of Trade and Industry (DTI) na batay sa kanilang monitoring nagsimula nang tumaas ang presyo ng ilang produktong pang-Noche Buena gaya ng ham, queso de bola at fruit cocktail sa mga palengke at supermarket.
Sinabi ni DTI assistant director Lilian Salonga na naglalaro sa P5 hanggang P11 ang itinaas sa presyo ng ilang brand ng ham.
“Kapag sinabi nating Noche Buena, hindi mawawala ang hamon. Iyan talaga ay mataas ang demand pagdating sa mga ganitong panahon at siyempre marami rin factors na nag-a-attribute sa pagtaas nito,” paliwanag ni Salonga.
Nasa P10 hanggang P14 naman ang dagdag-presyo sa queso de bola, depende sa brand. May bahagyang pagtaas din sa presyo ng fruit cocktail.
Wala pang paggalaw sa presyo ng pasta, macaroni at ilang brand ng condensada at creamer.
Samantala, tumaas din ang presyo ng manok at bigas ilang linggo bago ang Pasko, bagama’t iginiit ng Department of Agriculture na walang dahilan para itaas ang presyo ng mga ito.
Hinala nila na maaari umanong artipisyal ito o pakana na naman ng mga “middlemen” para kumita ng malaki.