MANILA, Philippines — Nasa 26 miyembro ng House Committee on Justice ang bumoto ng “yes” para sa pagbasura ng impeachment complaint na inihain nina Atty. Ferdinand Topacio at dating Rep. Jacinto Paras laban kay Commission on Elections (Comelec) chairman Andres Bautista dahil sa insufficient form.
Habang dalawa naman ang bumoto ng “No” na kinabibilangan nina House Deputy Majority leader Gwen Garcia at Kabayan partylist Rep. Harry Roque.
Bago ang botohan ay pinag-usapan muna ng mga miyembro ng komite ang substitute verification na ayusin ang depekto sa orihinal na verification kung saan sinasabing ang reklamo nina Topacio at Paras kay Bautista ay nakabase sa kanilang personal knowledge o paniniwala na tama o salig sa mga dokumento.
Sa substitute verification, sinasabing ang complaint ay base sa kanilang personal knowledge o nakabase sa authentic documents.
Ayon naman kay Oriental Mindoro Rep. Reynaldo Umali, chairman ng komite na hindi na magiging liberal ang komite sa pagtimbang ng sufficiency in form and substance ng complaint alinsunod sa naging desisyon nila noon nang ibasura ang impeachment complaint laban kay Pangulong Duterte dahil sa kawalan ng personal knowledge.
Subalit, sinabi naman ni Roque, isa sa endorser na dapat tanggapin ang substitute verification dahil hindi naman pinagbabawal sa impeachment rules and substitution.